San Enrique Mayor Trixie Fernandez, nagapati nga wala sang kaangtanan ang Mt. Bayoso sa nagluntad nga linog sa diin sentro ang ila banwa

By: JoMaque | Disyembre 31, 2019

Iloilo — Wala sang kaangtanan ang Mount Bayoso sa Barangay Abaca, San Enrique sa nagluntad nga magnitude 4.8 nga linog sang Disyembre 26 sang gab-i.

Ini ang pagpati ni San Enrique Mayor Trixie Fernandez bangud tectonic ang origin sang linog kag indi volcanic.

May mga istorya suno sa alkalde nga patay nga bulkan ang Mount Bayoso bangud may nadiskubre sadto nga ginapatihan volcanic rock gani nalakip siya sa listahan sang PHIVOLCS nga dormant volcano.

May nakahambal man nga naglupok ang Mount Bayoso sadto pero wala na sang may nakadumdom nga naglupok ini.

Pero indi sigurado si Fernandez sa mga impormasyon gani luyag niya ini nga kumpirmaron sa taga-PHIVOLCS.

Pila ka mga residente sa nasambit nga barangay ang nagapati nga bukid lang kag indi bulkan ang Mount Bayoso.