Tigbauan Mayor Suzette Alquisada ginkumpirmar nga may 2 confirmed COVID-19 case sa Tigbauan

By: Khenjo Terco | Via Aksyon Radyo Iloilo

Nagpasiguro si Tigbauan Mayor Suzette Alquisada nga kontrolado sang Local Government Unit ang sitwasyon sa iya banwa.

Ini pagkatapos ginkumpirmar ni Alquisada nga duha sa lima ka mga Overseas Filipino Workers nga nag-abot sa Tigbauan  sang Abril 9 ang nagpositibo sa COVID-19.

Suno kay Alquisada, wala sang sintomas nga nabatyagan ang mga OFWs.

Sang nag-abot sila sa Iloilo City sang Abril 9 halin sa Cebu, wala sila ginpahanugutan nga makapauli gilayon sa ila balay sa baylo gindala sa eskwelahan para sa quarantine.

Padayon nga ipahamtang sa eskwelahan ang lima ka mga OFWs.

Ang LGU ang naga-monitor sa ila kag nagahatag sang ila kinahanglanon.

Ang 2 confirmed COVID-19 patients sa Tigbauan ang mga seafarers nga halin sa Japan.

Marso 19 sang nag-abot sila sa Cebu.

April 10 sang ginkuhaan sila sang specimen kag kahapon, Abril 17, na-release ang laboratory results.

Suno kay Alquisada, lunsay mga lalaki ang mga seafarers nga naga-edad 30 tubtob 35 anyos.

Gina-disinfect sang LGU ang mga kwarto nga ginateniran sang nga OFWs

‘Indi mag-discriminate’

Nagpanawagan naman si Alquisada nga indi mag-discriminate sa mga OFWs ilabi sa nagpositibo sa COVID-19.

Dugang niya, importante man ang pangamuyo kag pagbuligay agud malampuwasan ang sitwasyon.