Pagbukas sang klase sa Agosto 24, indi pwede mapaiway – DepEd

By: JoMaque | June 8, 2020

Iloilo City — Indi pwede nga mapa-iway ang pagbukas sang klase ilabe na nga madamo ang nagapa-enroll online para sa August 24 class opening.

Ini ang panindugan ni Department of Education (DepEd) Secretary Leonor Briones kasunod sang pagpasar sang senado sa 3rd and final reading sang hagna nga nagahatag sang otoridad kay Presidente Rodrigo Duterte nga i-reschedule ang pagbukas sang klase.

Kumpiyansa si Briones nga indi man magdesisyon ang presidente nga wala sang konsultasyon sa ahensya base man sa probisyon sang laye.

Pero handa suno sa iya ang DepEd nga magsunod pananglitan may yara sang ipatuman nga pagbag-o.

Sa subong, nagapadayon ang remote enrollment system sang DepEd para sa distance learning sa tunga sang COVID-19 pandemic.