Kamatayon sang LSI nga yara sa quarantine facility sang Caluya, Antique, wala sang kaangtanan sa COVID-19 — Municipal Health Officer

By: JoMaque | June 10, 2020

Antique — Wala sang kaangtanan sa COVID-19 ang kamatayon sang 34-anyos nga lalaki nga locally stranded individual  nga yara isolation facility sang Barangay Semirara, Caluya, Antique. 

Ginpaathag ni Caluya Municipal Health Officer Dr. Anna Marie Villalobos nga Acute  Myocardial Infarction ukon atake sa korason ang gintunaan sang kamatayon sang nasambit nga LSI.  

Nag-abot ang lalaki sa Semirara sang Hunyo 4 halin sa Zambales nga may kompleto nga dokumento nga gina-require sang Balik Banwa Program sang Caluya kag kabahin sang protocol ang 14 ka adlaw nga quarantine sa community isolation center. 

Ginpa-idalom siya sa Rapid Diagnostic Test sa Zambales kag negative ang resulta. 

Wala na siya gin-RDT sa Semirara bangud base sa iya medical record, wala siya sang COVID-19 symptoms samtang nagatenir sa isolation facility.

Gin-report ni Semirara Punong Barangay  Catherine Lim sa Inter Agency Task Force nga napatay ang nasambit nga LSI sang Hunyo 8 sang aga.