Hinablos, patay sang gintiro sang iya tiyo sa Calinog

By: JoMaque | July 26, 2020

Calinog, Iloilo– Patay ang hinablos matapos gintiro sang iya tiyo nga barangay kagawad sa Supanga, Calinog kahapon, Hulyo 25.

Suno kay Police Colonel Genesis Roque, hepe sang Calinog MPS, ginkilala ang hinablos kay Jemar Libuna, 21-anyos sang amo man nga barangay samtang ginkilala ang suspek kay kagawad Ronnie Libuna, 45-anyos.

Ginpahayag ni Roque nga la-1 sang hapon sang nakabaton sila sang impormasyon nga may shooting incident sa nabukid nga porsyon sang lugar.

Gilayon sila nag-conduct sang follow-up operation kag natukiban nga las 9 pa sang aga natabo ang insidente.

Naglabay sa balay sang suspek ang biktima kag gintiro sang 12-gauge homemade shotgun suno kay Roque.

Nakaagum sang pilas sa nagkalain-lain nga parte sang lawas ang biktima.

Nagpalagyo naman ang suspek matapos ang krimen.

Wala na-recover ang pusil nga gingamit sang suspetsado.

Away sa duta ang ginatan-aw nga motibo sang pulis sa krimen.