Iloilo City Health Office, nagkumpirmar nga may positibo nga COVID-19 case sa Brgy. West Timawa, Molo

By: JoMaque | August 9, 2020

ILOILO CITY – Ginkumpirmar sang City Health Office nga may positibo nga kaso sang COVID-19 sa West Timawa, Molo.

Ang nagpositibo sa amo nga barangay, kabahin sang 56 ka nadugang nga kaso sa syudad nga gin-report ni Mayor Jerry Treñas sang Agosto 7.

Ginpabutyag ni Mayor Treñas nga na-base ang iya report sa ginpasa na sa ila nga RT-PCR test results sang COVID-19 laboratories.

Sa interview sang Aksyon Radyo sa alkalde kaina sang aga, iya ginpabutyag nga, “Ang report ni gahalin tanan sa laboratory. Ang aton nga mga taga-City Health, nagasunod lang sa report nga halin sa laboratory.”

Una na nga ginpanginwala ni West Timawa, Molo Punong Barangay Nelly Magsipoc nga may positibo nga kaso sa ila barangay.