LMP-Iloilo, nagapang-alang alang sa bag-o nga guidelines sang National Task Force Against COVID-19 may kaangtanan sa management sang ROFs

By: JoMaque | Sept. 3, 2020

Iloilo City —  Nagapang-alang-alang ang League of Municipalities of the Philippines Iloilo Chapter sa bag-o nga guidelines sang National Task Force Against COVID-19 nga indi na kinahanglan ipa-idalum sang receiving LGU sa 14-day quarantine kag repeat RT-PCR test ang returning overseas Filipinos nga may negative RT-PCR test.

Ginpahibalo ini ni LMP Iloilo President kag San Enrique Mayor Trixie Fernandez sa meeting nga ginpatawag ni Governor Arthur Defensor, Jr. kaina.

Kaupod man sa Zoom meeting ang taga-Regional Task Force Against COVID-19, DILG Iloilo kag DOH 6.

Suno kay Fernandez, may kahangawa ang mga mayors bangud pila ka beses na nga nalapas ang home quarantine antes ang bag-o nga guidelines.

Pila ka kaso naman sang ROF nga may negative RT-PCR test result halin sa Manila ang nagpositibo sang gin-retest pag-abot sa Iloilo, suno kay Fernandez.

Mapatawag si Defensor sang meeting sa tanan nga mayors buwas, Setyembre 3, agud ma-harmonize ang bag-o nga guidelines sa ginapatuman nga health protocols sang mga LGUs.

Nagapreparar man suno kay Fernandez ang LMP Iloilo sang resolution nga nagapamatuk sa bag-o nga polisa, pero pa-aprubahan niya pa sa tanan nga mayors sa probinsya antes ipadala sa NTF.

“MAY GRAY AREAS”

Gin-ako ni Fernandez nga may mga gray areas sa bag-o nga guidelines sang NTF.

Wala man sang ideya si Fernandez kun may mga mayors na nga nagasunod sa mandu.

Wala pa sang nag-abot nga ROFs sa San Enrique halin sang ginpaguwa ang bag-o nga order.