Concerned citizen nga taga-La Paz, nagreklamo nga ginsaylo sa Jaro ang iya kuntador
Iloilo City — Natingala si Florita Guzman sang Ticud, La Paz kun ngaa nakalab-ot na sa Bito-on, Jaro ang iya kontador sa kuryente kabangdanan nga nagpalab-ot siya sang reklamo sa Aksyon Radyo Iloilo.
Suno kay Guzman, December 2019 sang natumba ang poste nga gina-angutan sang iya kontador sa Brgy. Ingore sang ang PECO pa ang nagadumala sang elektrisidad sa siyudad.
Wala niya na-follow up ang pagpabalik sang iya metrohan sang gin-islan ang poste bangud yara siya sa Manila sadto nga tiun.
Temporaryo siya nga nag-connect sa iya utod kag nag-apply sang bag-o nga connection sa MORE Power.
Apang natingala siya nga may bill gihapon nga naga-abot sa iya. Sang nagpangusisa siya sa MORE natukiban nga sa Bito-on, Jaro na nahamtang ang iya kontador.
Ginkatingila niya man kun sin-o ang nagagamit sang kuryente nga naga-angot sa iya kuntador bangud base sa pinakaulihi niya nga pagbayad, naglab-ot sa P9,326.97 ang iya nga electric bill.
Nagpasalig naman si MORE Electric and Power Corp. Spokesperson Jonathan Cabrebra nga imbestigaran nila ang reklamo ni Guzman.
Suno kay Cabrera hibaluon nila kun sin-o ang nagagamit sang kuntador apang ginpahayag niya nga sukton nila gihapon ang ginkonsumo sini nga kuryente.Wala man sang problema kun luyag ni Guzman nga ipabalik sa La Paz halin sa Jaro ang iya nga kuntador.
I-preparar lang suno kay Cabrera ang mga kinahanglanon nga dokumento agud mapadasig ang pagproseso.
