16-anyos nga dalagita sa Guimaras, nagreklamo nga 14 ka beses ginhimuslan sang iya 65-anyos nga lolo
Nagreklamo ang 16-anyos nga dalagita sa Guimaras nga 14 ka beses siya nga ginhimuslan sang iya 65-anyos nga lolo.
Suno kay alyas Inday, nagsugod ang paghimulos sa iya sang iya nga lolo sang Marso subong nga tuig.
Nagakatabo ini kun wala sa ila balay ang iya nga lola. May duha ka mga utod si Inday kag kaupod nila nga naga-istar sa ila nga balay ang ila lolo kag lola nga mga ginikanan sang ila nanay halin sang nagbulagay ang ila amay kag iloy sang 2014.
Natabo suno kay Inday ang una nga paghimulos sa iya sang ginhagad siya sang iya nga lolo nga mag-upod sa pagpanguha sang pakinhason bangud wala sila sang inugbakal sang sud-an.
Nasundan pa ini sang makapila ka beses sa kada maghalin sa ila balay ang iya nga lola.Katapusan nga nahimuslan si Inday sang Nobyembre.
Nakapalagyo siya kag nakapangayo sang bulig sa tanod commander kag sa tatlo ka mga kagawad sang ila barangay.
Nakapa-blotter na sa pulis si Inday apang wala pa nakapa-medical exam tubtob subong bangud sang kapigaduhon.
Pareho na nga may live-in partners ang mga ginikanan nanday Inday. Sa Manila na nagatenir ang ila nga iloy nga may duha na ka kabataan samtang wala naman nila nahibaluan kun diin nagatenir ang ila nga amay.
