COVID-19 cases sa Western Visayas, malapit na 26,000

By: Aine Grace Bravo | March 17, 2021

ILOILO CITY – Yara na sa 25,913 ang kaso sang COVID-19 sa Western Visayas sang nadugang ang 30 ka bag-o nga kaso kahapon, Marso 16.

Sa bag-o nga kaso, 22 ang local cases ukon wala sang travel history sa guwa sa Rehiyon 6 kag walo (8) ang Locally Stranded Individuals (LSIs).

Base sa Case Bulletin No. 354 sang Department of Health 6, nagpanguna ang Negros Occidental nga may pinakamadamo nga bag-o nga kaso nga naglab-ut sa 11.

Nagasunod ang Iloilo City nga may siyam (9); anum (6) sa probinsiya sang Iloilo; duha (2) sa Bacolod City; kag tag-isa (1) sa Aklan kag Guimaras.

Sa kabug-usan nga kaso, 1,181 ang active cases ukon wala pa naka-recover sa virus.

Samtang, nadugangan sang 59 ka bag-o nga recoveries ang rehiyon rason nga nagsaka sa 23,965 ang kabug-usan nga nag-ayo.

Wala naman sang nadugang sa mga napatay kag nagapabilin sa 761 ang total deaths bangud sa COVID-19 sa Western Visayas. –Via DOH 6