Death toll sa pag-crash sang C-130 plane sa Patikul, Sulu, naglab-ut na sa 45
45 na ang napatay pagkatapos nag-crash ang Philippine Air Force C-130 nga may karga nga masobra sa 90 ka mga pasahero sa Barangay Bangkal, Patikul, Sulu las 11:30 kahapon sang aga, July 4.
Sa report sang Joint Task Force Sulu, nalakip sa mga napatay ang 42 ka military personnel kag tatlo ka sibilyan.
Suno kay Defense Secretary Delfin Lorenzana, sakay sa eroplano ang tatlo ka piloto, lima ka crew members kag ang nabilin lunsay mga suldado.
Halin sa Cagayan de Oro ang eroplano kag padulong sa Jolo, Sulu sang nag-crash.Base sa initial nga impormasyon halin kay AFP Chief of Staff General Cirilito Sobejana, mahugpa ang eroplano sa Jolo airport sang naglapaw sa runway.
49 ka soldado ang na-rescue kag gindala sa ospital, lima ka iban pa ang nagapabilin nga unaccounted samtang apat ka sibilyan ang napilasan nga ginabulong man sa ospital.Padayon ang search and rescue operations sang mga otoridad.
Ang mga pilason ang gindala sa Kuta Heneral Teodulfo Bautista Station Hospital sa Jolo samtang ang iban ang gindala sa Zamboanga para sa nagakaigo nga pagbulong.
Suno sa militar, lakip sa mga sakay sa eroplano ang bag-o nga mga suldado nga i-deploy kuntani sa Sulu bilang kabahin sang anti-terrorism campaign sang gobyerno. | with reports from CNN Philippines
