Ginakabig pinakatigulang nga tawo sa Pilipinas nga si Francisca ‘Lola Iska’ Susano nga taga-Negros Occidental, napatay sa edad nga 124

NEGROS OCCIDENTAL – Napatay sa edad nga 124 si Francisca “Lola Iska” Susano, ang ginakabig pinakatigulang nga tawo sa Pilipinas, pasado las-6 kagab-i, Nobyembre 22. Ginkumpirmar ini sang iya himata nga si Merlene Susano.

Suno sa iya, wala man sang ginbatyag si Lola Iska kag posible, dala lang sang iya katigulangon ang iya kamatayon.

Setyembre 11 sang nagsaulog sang kaadlawan si Lola Iska. Gin-apply siya sa Guinness Book of World Records agud kilalahon bilang pinakatigulang nga “living person” sa kalibutan.

Apang base sa impormasyon nga nakuha sang iya pamilya, wala siya makapasar bangud sa kakulang sang dokumento.

Wala pa nakadesisyon ang pamilya sa detalye sang hamyang kag lubong ni Lola Iska. Si Lola Iska ang tumandok sang Kabankalan City, Negros Occidental. | via Aksyon Radyo Bacolod