13-anyos nga solterito, patay sang ginmartilyo sa sulod sang ila balay sa Pototan, Iloilo

ILOILO – Patay ang 13-anyos nga solterito sa Brgy. Casalsagan sang ginmartilyo sa ulo sang wala pa makilala nga suspetsado kagab-i, Marso 29.

Suno kay Raul Pachejo nga tatay sang biktima, sa ila nga computer shop lang nagatinir ang iya nga bata. Pag-abot niya wala niya ini nakit-an sa computer shop kabangdanan nga iya ginpangita.

Pagsulod niya sa ila nga kusina, nakit-an niya na lang nga nagahuray-ad na kag duguon ang iya nga bata sang ginpasiga niya ang suga. Nakit-an niya man nga may martilyo sa tupad sang iya nga bata.

Ginhingagaw pa dala ang bata sa ospital apang wala gid natabangan. Ginpahayag sang amay wala man sang kontra ang iya nga bata bangud ang paghampang man lang sang computer ang iya nga ginahimo. Ginpabutyag man sang tatay sang bata nga masami sila ginakawatan.

Posible suno sa iya nga may nagtuyo liwat nga mangawat kag nakit-an sang iya nga bata. Mahimo suno sa iya nga kilala sang bata ang kawatan kabangdanan nga iya ginpatay.

Suno naman kay Punong Barangay Jessie Luceño, nakapanugid sa iya ang tatay sang bata nga nagakadula ang benta sang ila nga piso net.

Ginpahayag man sang tatay nga posible isa sa mga nagahampang sa ila nga computer shop ang nagakuha apang wala siya nanugid kun sin-o.

Ang mag-amay na lang ang magkaupod nga nagapangabuhi kag duha lang sila ang naga-estar sa ila nga balay.