68-anyos nga senior citizen nga babaye, nagreklamo nga ginhimuslan sang lalaki nga nakaupod niya sa ilimnan sa Anilao

ILOILO — Nagreklamo ang 68-anyos nga babaye nga ginhimuslan siya sang 26-anyos nga lalaki sa isa ka barangay sa Anilao, Iloilo.

Suno kay Cpl. Felinilyn Gumban, deputy chief sang Women and Children Protection Desk sang Anilao Police Station, natabo ang pagpanghimulos las-10:30 sang Sabado sang gab-i apang las-12:45 na sang Domingo sang kaagahon nila nabaton ang report.

Base sa imbestigasyon sang kapulisan, updanay nga nag-inum-inom sa birthday ang duha antes natabo ang insidente.

Sang naglisensiya ang tigulang nga mapauli, nagboluntaryo ang lalaki nga idul-ong siya sa ila balay. Apang pag-abot nila kawayanan, ginhimuslan sang lalaki ang tigulang.

Gilayon naman nga nagpalagyo ang lalaki pagkatapos sang natabo.

Naka-confine subong sa Barotac Nuevo Hospital ang tigulang bangud nga gin-bleeding.