Babaye, patay sang nakabunggo ang ginasakyan nga motorsiklo sa delivery truck sa Banate
ILOILO —
ILOILO – Patay ang 22-anyos nga babaye sang nakabunggo sa delivery truck ang gina-angkasan niya nga motorsiklo sa Barangay Bularan, Banate kahapon, Marso 29.
Ginamaneho ni Kenneth Pagdato, 23, sang Brgy. Alimono, Passi City ang motorsiklo samtang naga-angkas ang napatay nga si Chderelyn Tupaz, 22, sa diin ginasabak niya ang iya isa ka tuig nga bata nga babaye kag upod pa gid ang iya manghod nga 16-anyos lunsay taga-Cubay, San Enrique.
Suno kay Police Master Sergeant Hizron Baterbonia, imbestigador sang Banate Police Station, halin sa Villa Francisca sa Banate, Iloilo ang mga nakasakay sa motorsiklo kag papuli na kuntani sa San Enrique sang nagluntad ang aksidente.
Pag-abot suno kay Baterbonia sa Barangay Bularan, nakabunggo ang motorsiklo sa delivery truck nga hinali lang nag-U turn. Ginamaneho ni Khim Balinatnat ang truck.
Gilayon nga gindala sa ospital ang mga naga-angkasanay sa motorsiklo pero wala gid natabangan si Chderelyn samtang napilasan naman ang kaupdanan niya.
Yara na sa custody sang Banate Police ang driver sang delivery truck.
