2 ka lalaki, gin-aresto bangud sa paglapas sa Comelec Gun Ban sa Calinog; Mga pusil kag bala, nakumpiskar

ILOILO – Gin-aresto ang duha ka lalaki bangud sa paglapas sa Comelec gun ban sa Barangay Cabugao, Calinog, las -12:51 sang hapon, Abril 21.

Base sa imbestigasyon ni PSSgt. Joven Aldabon sang Calinog Municipal Police Station, samtang naga-conduct sang checkpoint ang kapulisan, nakumpiskar kanday Danny Lopez, 41, sang Brgy. Datagan, Calinog kag Nixon Loder sang Brgy. Pajo, Lambunao ang isa ka M11 Caliber 9mm nga may long magazine.

Nakuha pa gid sa duha ang .45 caliber pistol nga may ara sang siyam ka mga live ammunitions kag 31 ka live ammunitions sang .45 caliber pistol.

Yara na sa kustodiya sang Calinog police sanday Lopez kag Loder.

Pasakaan sila sang kaso suno kay Aldabon bangud sa paglapas sa Comelec Gun Ban kag RA 10591 ukon illegal possession of firearms.