Panay Railway System, posible nga mabalik sa termino ni Pres. Marcos, Jr kun ma-umpisahan sang temprano — PNR

Masarangan nga mabalik ang Panay Railways System sa sulod sang termino ni Presidente Ferdinand Marcos, Jr. kun maumpisahan ang pagkay-o sini sang mas timprano.

Suno ini kay Atty. Roy Villa nga miembro sang governing board sang Philippine National Railways. Ginpaathag niya nga may daan na nga mga linya ang Panay Railways halin sa Iloilo City padulong sa Roxas City, Capiz kag madasig lang ini nga mabalik ukon ma-revive.

Apang antes suguran ang proyekto kinahanglan pa ini nga tun-an sang maayo kag madamo pa sang consultation nga himuon para nga indi ma-uyang ang pondo. Indi man kinahanglan ang legislation sa pag-revive sang railways system pero maagi ini sa mga proseso pareho sang pagpangita sang investor nga pwede magpondo diri. Ginpaathag ni Villa nga indi basta-basta ang investment sa railways bangud billion ang kinahanglanon nga pondo.

Importante man suno sa iya ang kooperasyon kag pagbaton sang LGUs sa nasambit nga proyekto agud magmadinalag-on ang plano sang national government.

Ginpabutyag ni Villa nga ang railways system ang pinaka-safe, pinakabarato, kag environmentally-friendly nga transport system.