2 ka balay nasunog sa Zamora-Melliza, City Proper

ILOILO CITY – Nagbilin sang P343,000 nga kahalitan ang sunog sa Zone 2, Zamora-Milleza, City Proper kahapon sang aga, Agosto 11.

Suno kay City Fire Marshal Publio Ploteña sang Bureau of Fire Protection Iloilo City sa initial nga imbestigasyon, nag-umpisa ang kalayo sa 2nd floor sang balay ni Yolanda Elpeloa kag naglaton sa balay ni Melin Selis.

Lunsay human sa light materials ang mga balay suno kay Ploteña rason nga madasig nga naglaton ang kalayo.

Madasig suno kay Ploteña ang pagresponder sang mga bombero, kag sa bulig sang barangay officials, mga residente kag iban pa nga mga volunteer groups napalong ang kalayo. Bangud man sang fire wall, wala na naglapta ang kalayo.

Gina-imbestigaran pa sang BFP kun ano ang ginhalinan sang kalayo.

Wala sang may napilasan ukon napatay sa insidente, suno kay Ploteña.

Base sa record sang City Social Welfare and Development Office, walo ka pamilya ukon 21 ka indibidwal ang na-apektuhan sang sunog

Nakapanghatag na sang food assistance ang CSWDO sa mga nasunugan kag ginaproseso naman ihatag nga financial assistance.