250 KA PULIS NGA GIN-REQUEST NI ILOILO CITY MAYOR TREÑAS IBUTANG SA COMMAND CENTER SANG SIYUDAD

ILOILO CITY – Naghingyo si Mayor Jerry Treñas sang dugang nga mga pulis nga ibutang sa Iloilo City Action and Response (ICARE) Command Center nga ginbuksan na sa Gaisano Iloilo City Center sa Diversion Road sa Mandurriao.

Dugang nga 250 ka mga pulis ang gin-request sang alkalde sa Police Regional Office 6.

Nakaabot na suno kay Mayor Treñas ang 100 ka pulis kag ginahulat pa ang iban nga matapos ang training.

May nakahanda naman nga police cars para sa mga pulis nga magatawo sa Command Center.

Ang lima ka panalgan nga building ang gina-man sang City Disaster Risk Reduction and Management Office, kag maga-host man sang personnel kag equipment sang Public Safety and Transportation Management (PSTMO), Iloilo City Police Office (ICPO) kag BFP Iloilo City Fire Station para sa mas madasig nga pagresponder sa mga emerhensya.

May ICARE substations man nga naga-operate na sa Brgy. Calumpang, Molo kag Brgy. Balantang, Jaro, samtang padayon nga gina-obra ang substation sa Brgy. Ungka, Jaro.

Ginaproseso naman ang bidding para sa pagpatindog man sang dugang nga ICARE substations sa Megaworld sa Mandurriao; sa tupad sang ICAG sa Molo; Brgy. Nabitasan, La Paz; Brgy. Tanza Esperanza, City Proper; kag Brgy. Sooc, Arevalo. –with additional information from Iloilo City PIO