19-anyos nga pintor, ginbuno sang menor-de-edad nga nakasakay kag nakabais niya sa jeep
ILOILO CITY — Confined sa West Visayas State University-Medical Center ang 19-anyos nga pintor sang ginbuno sang iya nakasakay sa jeep nga menor-de-edad sa Jaro las 7:10 kaina sang aga.
Ginkilala ang biktima kay Psyvert Cachuella sang Airport, Mandurriao.
Sa initial nga imbestigasyon ni Police Staff Sergeant Saturnino Dela Cruz sang Jaro Police Station, pakadto sa iya obra sa Jalandoni, Jaro ang biktima sang nakasakay sa Jaro CPU Ungka nga jeep ang tatlo ka mga menor-de-edad.
Ginsaway sang biktima ang tatlo ka mga menor nga nagadogsing sa sulod sang jeep tubtob nga may nagluntad nga pagba-isay.
Pag-abot sa outpost sang Brgy. San Isidro, Jaro nagpanaug ang mga menor-de-edad pero naghunos sang balisong ang nakaba-is sang biktima kag ginbuno siya sa likod.
Naga-edad sang 15 anyos ang ginatudlo nagbuno sa biktima kag nagapabilin nga at large upod sa isa pa gid ka menor.
Ginpahayag ni Dela Cruz nga wala sang partisipasyon sa insidente ang duha pa ka menor-de-edad nga kaupod sang nagbuno.
Pero may mga police records ang tatlo ka menor kag masami nga nagapa-amulya sa Quintin Salas, Jaro suno kay Dela Cruz.
