Final amendments sa LPTRP, isumiter sang Iloilo city gov’t sa DOTr sa Setyembre
ILOILO CITY – Ginahitsu pa sang Iloilo City Government ang amendments sa mga ruta nga ipatuman sa Local Public Transport Route Plan (LPTRP).
Suno kay Councilor Sedfrey Cabaluna, chairman sang Committee on Transportation sa Iloilo City Council, ginpamatian kag basehan ang sentimento kag inputs sang magkatuhay nga sector sa gin-conduct nga orientation kag konsultasyon.
Masapol man subong, Agosto 16, ang gintukod nga technical working group sang city government sa taga- Iloilo Provincial Government agud ma-harmonize ang LPTRP kag madiskusyunan kun makasulod ang provincial jeepneys sa siyudad.
“Tomorrow that’s August 16 until the 30th we allow the technical working group to consolidate na tanan nga mga suggestions and to balance it also with the interest of other sectors so that we can see na ang iduso nga LPTRP sa DOTr,” suno kay Cabaluna.
May hiwaton nga Transport Summit sa Agosto 30 sa University of the Philippines-Visayas agud ma-finalize ang mga natipon nga inputs. Gilayon man ini nga ipresentar sa magkatuhay nga sector agud makita kun ano gid ang plastada sang ipatuman nga LPTRP.
Ginpahayag ni Cabaluna nga plano sang technical working group nga isumiter sa DOTr ang pinal nga mga ruta sa ikaduha nga semana sang Setyembre 2022.
Hunyo 12 sang ginpatuman sang siyudad ang LPTRP pero ginuspender sang 45 ka adlaw sugod sang Hulyo 8 kasunod sang pagpakamalaut sang publiko ilabe na sang mga commuters.
