Lalaki, nabun-an sang nagtambag sa away sang iya abyan sa Calumpang, Molo
ILOILO CITY — Gindala sa ospital ang 24-anyos nga lalaki sang ginbuno sa Barangay Calumpang, Molo kagab-i, Agosto 16.
Ginkilala ang napilasan kay Jeffrey Carl Decena, may pilas sa likod nga parte sang iya lawas.
Suno kay Police Corporal Revel Louie Paciente, imbestigador sang Molo Police Station, nagtambag si Decena sa abyan niya nga natripingan sang suspetsado nga si Melvin Javana, 21-anyos.
Base naman sa panaysayon sang lola ni Decena nga si Viol Jellangeran, nagpuli pa sa ila balay ang iya apo kag nakibot na lang siya mga las-10 sang gab-I sang ginpahibalo nga nabun-an si Jeffrey.
Dugang pa niya nga naka-istoryahanay pa si Decena kag si Javana bangud kilalahay man sila nga duha.
Gintubuhan para makuha ang dugo nga nagmala sa pilas ni Decena, suno kay Jellangeran.
Ginpanginwala naman ni Javana nga siya nagbuno kay Decena.
Preso sa Molo Police Station si Javana.
