3 ka persons of interest, ginatutukan sang IPPO sa shooting incident sa Estancia
May tatlo ka persons of interest ang Iloilo Police Provincial Office (IPPO) sa pagpatay sa mag-abyan sa Villa Panian, Estancia kahapon sang aga.
Suno kay IPPO Director Colonel Adrian Acollador, lakip sa mga persons of interest si Jevron Parohinog nga nakasalbar sa insidente.
Ginasunod nga anggulo sang mga imbestigador suno sa iya ang transaksyon sa utang sang negosyo sang mag-abyan base man sa panaysayon ni Parohinog.
Ginpahayag ni Acollador nga si Jevron ang may ihatag nga P7.5 million kay JP Bosque sang nagkadto sila sa Estancia upod kanday Mark Libao kag Floyd Fernandes.
Magkasosyo suno sa iya sa negosyo sanday Parohinog kag Bosque kag ang P4 million sa amo nga kantidad ang proceeds sa ginbaligya nga fishing vessel samtang P3 million naman ang komisyon.
Apang padayon pa ini nga ginapadalman sang mga imbestigador suno kay Acollador.
Dugang pa ni Acollador, wala pa sila sang identity sa iban nga persons of interest kag description pa lang ang ginhatag ni Parohinog.
Ginsumiter naman sang Estancia police sa Regional Anti-Cybercrime Unit (RACU) sa Police Regional Office 6 ang dashcam footage sang salakyan kag ang cellphones sang mga biktima.
Gina-abe abe naman ni Acollador ang pagtanyag ni Iloilo City Mayor Jerry Treñas sang reward money sa makahatag sang impormasyon sa nagpatay sa tatlo ka mag-abyan.
Nanginwala naman si Veronica Dazon, nobya ni Bosque nga nanghulam ang iya nobyo sang kuwarta kay Parohinog. Sa mensahe ni Dazon nga ginpadala sa Aksyon Radyo, ginpabutyag niya nga si Parohinog ang may utang nga P7 million sa iya nobyo kag P3 million kay Fernandes.
