Delivery driver patay, 2 ka pahinante pilason sang gintiro sa Lambunao; koleksyon sang mga biktima gintaban sang mga suspek

LAMBUNAO, Iloilo – Patay ang driver sang delivery van sang sigarilyo samtang pilason ang duha niya ka pahinante sang gintiro sang wala pa makilala nga suspects sa Brgy. Pasig, Lambunao mga las-2 sang hapon, Setyembre 15.

Ginkumpirmar ini ni Punong Barangay Divina Lemeric. Suno sa iya may igo ang driver sa ulo samtang gindala naman sa ospital ang mga pahinante.

Gin-identify ang napatay kay Jerry Paldas sang Brgy. Gemumua Agahon, Passi City. Padayon naman nga ginabulong sa ospital kanday Elbert Mardoquio sang Brgy. Inaladan, Cabatuan, kag Jeriel Nalangan sang Brgy. Libot, Calinog.

Suno kay Tanod Jonee Celeste, nagalakat lang ang tatlo ka suspek.

Base sa iya nakita, nagasunod pa sa mixer truck ang delivery van kag padulong sa direksyon sang Poblacion sang naghinay pag-abot sa maligwin nga porsyon sang Brgy. Pasig.

Ginpahayag ni Celeste nga gulpi lang nag-ulhot ang mga suspects kag nagpangtaya sang pusil kag gintiro ang mga biktima.

Anum ka lupok ang nabatian sang tanod. Na-recover naman sa lugar ang duha ka basiyo sang 12 gauge shotgun.

Gina-check pa sang Lambunao police kun ano ang mga nadula sa delivery van.

Suno kay PCpl Risan Laroza, imbestigador sang Lambunao MPS, nagpabutyag ang manager sang kompaniya sang mga biktima nga may sulukton ang mga biktima sa Brgy. Jayubo, Lambunao nga P300,000. Kun nasukot nila, ginabanta nga magalab-ut sa P500,000 tubtob P800,000 ang nataban sang mga suspect.