P50,000 nga reward, gintanyag sang Iloilo City government sa makatudlo sang nagpatay sa 3 ka mag-abyan sa Estancia
ILOILO CITY – Ginkumpirmar ni Mayor Jerry Treñas nga mahatag ang City Government sang P50,000 reward sa makatudlo sa suspect sa pagpangtiro patay sa mag-abyan nga negosyante nga kanday JP Bosque, Floyd Fernandes kag Mark Libao sa Villa Pani-an, Estancia kahapon sang kaagahon, Setyembre 14.
Suno sa alkalde, makaluluoy ang natabu sa mga biktima. Dugang sang alkalde, daku sila nga kadulaan sa business community.
“Naga-confirm ako nga mahatag ang syudad sang P50,000 sa any witness who will be able to help to [locate] the perpetrator or perpetrators to this heinous crime,” ang pahayag pa ni Treñas.
Ginkumpirmar man ni Treñas nga pangayuon niya ang assistance sang police nga maka-certify sang statement sang posible witness antes ihatag ang reward.
Una na nagmandu si Mayor Treñas sa Iloilo City Police Office (ICPO) nga magbulig sa imbestigasyon sang Iloilo Police Provincial Office. Ang mga biktima ang lunsay residente sang siyudad.
