Mga patyo sa Iloilo City ‘fully open’ na sa piesta minatay
ILOILO CITY – Bukas na sa tanan ang mga patyo sa Iloilo City sa piesta minatay sa masunod nga bulan.
Ini ang ginpahayag ni Mayor Jerry Treñas sa iya Facebook post bangud amat-amat na nga nagabalik sa normal ang sitwasyon.
Madumduman nga sang nagligad nga duha ka tuig, hugot nga ginlimitahan ang publiko sa pagbisita sa mga patyo agud masiguro ang pagsunod sa health protocols bangud sa COVID-19 pandemic.
Suno kay Treñas, magapadayon sa pagtinlo kag pagpreparar ang mga personnel sang City Environment and Natural Resources Office (CENRO) sa mga public cemeteries.
Ginapreparar naman suno sa alkalde sang kapulisan, taga-Public Safety and Transportation Management Office kag City Disaster Risk Reduction and Management Office kaupod ang taga-Red Cross kag volunteer groups ang plano para sa safety sang publiko sa pag-obserbar sang piesta minatay.
