Bacolod City Mayor Albee Benitez, ginbida ang report sang business groups nga nalapawan na sang siyudad ang Iloilo City; Mayor Jerry Treñas nag-react
Nangin kontrobersyal ang pagbayluhanay sang pahayag nanday Bacolod City Mayor Albee Benitez kag Iloilo City Mayor Jerry Treñas may kaangtanan sa development sang duha ka highly-urbanized cities sa Western Visayas.
Nagsugod ini sang ginbida ni Mayor Benitez sa media night sang Masskara Festival sang Oktubre 19, 2022 nga nalapawan na sang Bacolod City ang Iloilo City sa revenues sang mga business establishments base sa report sang business groups.
Ginpahayag ni Benitez nga nalab-ut na sang Bacolod ang pre-pandemic income rason nga ginkalipay ini sang alkalde.
Base sa report sang business groups suno kay Benitez, yara sa 33% ang market share sang Bacolod City samtang 31% naman sa Iloilo City.
‘BASI SA PUTOS SANG IBOS?’
Nakalab-ut naman kay Mayor Treñas ang pahayag ni Benitez kag ginkwestyun kun diin nga “putos sang ibos” nakuha ni Benitez nga nalapawan na sang Bacolod ang Iloilo City.
Sa flag ceremony sang Iloilo City Hall employees sang Lunes, Nobyembre 7, ginpabugal ni Treñas nga padayon nga nagapanguna ang Iloilo City sa Rehiyon 6 ilabe na sa pinakamalimpyo nga siyudad. Makapila man ka beses suno sa iya nga nangin “champion” ang siyudad sa tourism event.
Yari ang pahayag ni Mayor Treñas:
“Ambot kon diin nga putos sang ibos nakuha (ni Mayor Benitez) nga nalapawan na sang Bacolod (ang Iloilo City). Ang napierdihan ta gid lang sa Bacolod ang ila nga renewable energy. Ano ang renewable energy sa Bacolod? Ang ila wind energy kay ‘siyado ka hangin didto sa Bacolod. Sa cleanliness, sa tourism events, malayo sila sa aton. Surrender ko ya sa pahangin-hangin. Sa mga awards ya ambot kon diin sila.”
‘IDOL KO GID SI MAYOR JERRY TREÑAS’
Liwat nga nagsabat si Mayor Benitez kag ginpahayag nga gina-idolo niya si Mayor Treñas kag madugay na sila nga mag-abyan sang alkalde.
Ginakabig niya man nga mentor si Treñas. Naglahog pa si Benitez nga kun nalapawan gid man sang Bacolod ang Iloilo ini amo nga “huben” kag “gwapo” ang Mayor.
Gin-athag ni Benitez nga ginapabugal niya ang recovery sang Bacolod kag ang madinalag-on nga Masskara Festival sang siyudad.
Yari ang pahayag ni Mayor Benitez:
“I admire Iloilo City. In fact, idol ko gid si Mayor Jerry Treñas. Dugay na kami migohay and I look up to him as a mentor and a yardstick of leadership and initiative. Guro kun may ara nalapawan ang Bacolod sa Iloilo, amo na nga mas huben kag gwapo ang Mayor. Kidding aside, we are proud of Bacolod’s recovery so far. We just had a very successful Masskara Festival which boosted local consumption. Ang hangin sa Bacolod makusog nga nagadapya pakadto sa mainuswagon nga ekonomiya.”
Sa Facebook page sang Iloilo City government subong nga adlaw, ginpahayag ni Mayor Treñas nga importante ang development sang Bacolod sa rehiyon kag suportado sang Iloilo City ang tanan nga developmental efforts sang Bacolod.
“The development of Bacolod is important to the region. Iloilo city will always be supportive of all its developmental efforts. We should continue to reinvent and develop otherwise we become irrelevant,” ang pahayag ni Treñas.
