Empleyado sang LTO-Guimbal nga ginatudlo fixer sa ahensya dakup sa entrapment operation

ILOILO – Dakup sa entrapment operation ang 61-anyos nga empleyado sang Land Transportation Office-Guimbal sa operation nga gin-conduct sa Brgy. Bulad, Guimbal, kaina sang aga.

Suno kay LTO 6 Assistant Regional Director Gaudioso Geduspan, kabahin ang operasyon sang anti-fixing campaign sang ila ahensya.

Dugang niya, masobra 21 ka mga reklamo ang nabaton sang LTO-Guimbal extension office batuk sa empleyado nga ginkilala kay Rosie Orbista.

Ginpahayag ni Geduspan, nagapanukot si Orbista sang masobra P2,000 tubtob P3,000 sa actual transaction kag kun makolekta na ang bayad, wala na niya ginasipot ang kliyente. Gin-athag niya nga sa sulod sang duha ka tuig, masobra 70 na ka kaso ang napasaka batuk sa mga suspected fixers sang ahensya.

Detained si Orbista sa Guimbal Police Station kag natalana kasuhan. – via Justice Savannah Pamplona