Pork Fest sa Oton gindugukan

ILOILO – Madamo ang nagpadulong sa Oton kadungan sang labing una nga “Pork Fest” kag pagasundan sang “Light a Tree Program” kahapon, Disyembre 1.

Suno kay Oton-LGU Municipal Administrator Eusebio “Boy” Villavicencio, Jr., daku ang nabulig sang malawig nga preparasyon agud masiguro nga indi magginutok ang mga tawo.

Lain-lain nga putahe ang ginpreparar sang LGU nga ipakaon sang libre sa mga bisita nga nahatagan sang meal ticket.

Magluwas diri, nagtingub man ang mga bantog nga manug-lechon sa pagbaligya sa banwa. Paagi man ini suno kay Villavicencio nga mabuligan ang mga manug-lechon kag mga hog raisers sa banwa.

Ginsulit man niya nga tuyo sang LGU nga ipahibalo sa publiko nga safe kaunon ang mga baboy sa banwa bisan may na-record sila nga kaso sang African Swine Fever (ASF).