Pagkat-al sang girders sa Ungka flyover, ginakabalak-an ni Ilonggo Engr. Nilo Jardeleza
ILOILO — Ginakabalak-an ni Ilonggo CIvil Engineer Nilo Jardeleza ang nakit-an nga kat-al sa pila ka mga girders nga nagakonekta pakadto sa tagsa ka haligi sang Ungka Flyover.
Ginpahayag pa niya nga posible marumpag ang girders bangud nga nautod na ang angkla nga nagakonekta sa beams sang haligi.
Ginpa-athag man ni Jardeleza nga nagkat-al ang girders sa ikatatlo nga haligi bangud nga padayon ang paghulag pa-idalum sang ikaapat nga haligi.
Dugang pa niya posible nga marumpag ang girders nga nagakonekta sa nasambit nga mga haligi kun indi sa gilayon matukudan sang insakto ang ginareklamo nga pier sang flyover.
Nagapati naman si Jardeleza nga indi bastante ang shoring nga ginhimo sang contractor nga International Builders Corporation (IBC) agud nga temporaryo nga masuportahan ang mga haligi.
