Temporary suspension sang LPTRP sa Iloilo City ginpalawig tubton sa Pebrero 28

ILOILO CITY – Ginpalawig tubtob Pebrero 28, 2023 ang temporary suspension sang Local Public Transport Route Plan (LPTRP) sang Iloilo City.

Ini base sa Executive Order No. 2, series of 2023 ni Mayor Jerry Treñas.

Hunyo 12, 2022 sang ginpatuman ang LPTRP pero gin-ulan sang pagpakamalaot sang publiko rason nga gin-suspend sang Hulyo 8 sang nagligad nga tuig tubtob nga ginpalawig pa ang suspension.

Ginrason sang alkalde sa pagpalawig sang suspension ang nagapadayon nga COVID-19 pandemic, pagmahal sa presyo sang mga balaklon, pagdamo sang mga commuters ilabe pa nga nagbukas ang klase kahapon, kag panawagan sang publiko.

Magluwas diri, nagapadayon pa suno sa alkalde ang public consultation samtang ginahulat ang rekomendasyon sang Department of Transportation (DOTr) kag Land Transportation Franchising and Regulatory Board (LTFRB).

Suno kay Mayor Treñas, nagadali man siya nga maaprubahan ang LPTRP sang syudad.

May mga transport cooperatives naman nga naga-ayo na nga i-implementar ang LPTRP.