Rape with homicide napasaka na batok sa mga suspek sa pagpatay sa 6 ka tuig nga bata nga babaye sa Estancia

ILOILO — Napasaka na ang kaso nga Rape with Homicide sa mga suspek nga naghimulos patay sa anum ka tuig nga bata nga babaye sa Barangay Gogo, Estancia sang nagligad nga bulan.

Gin-file ang kaso kahapon sang hapon, Enero 5 sa Provincial Prosecutor’s Office batok sa mga suspetsado nga gintudlo sang mga testigo nga naghimulos kag nagpatay sa bata.

Kaupod sang Estancia police sa pag-file sang kaso si alyas Joven, amay sang bata.

Una diri, ginkumpirmar ni Police Staff Sergeant Dan Jerald Allanic, imbestigador sang Estancia Police Station, nga ginhimuslan ang bata base sa autopsy result.

Nasapwan ang biktima nga wala na sang pang-idalom nga panapton sang Disyembre 19.