Lalaki nga nanghangkat sang away patay sang gintiro sa Maasin

ILOILO — Patay ang 35-anyos nga lalaki nga nanghangkat sang away sa Brgy. Panalian, Maasin, kahapon sang hapon.

Ginkilala ang biktima kay Gilbert Constantino, mangunguma; samtang ang suspetsado kay Rodel Nepomuceno, 27-anyos, active auxiliary member sang Citizen Armed Force Geographical Unit, lunsay residente sang nasambit nga barangay.

Suno kay PCapt. Jayson Mausig, Officer-in-Charge sang Maasin Municipal Police Station, ginhangkat sang away ni Constantino si Nepomuceno tungod may daan na nga hiligut-anon ang duha.

May dala nga binangon si Constantino suno pa sa pulis rason nga gintiro ni Nepomuceno.

Naigo sa dughan si Constantino kag nagdalagan pa kuntani palayo apang ginlagas sang suspetsado kag gintiro nga naigo sa ulo.

Dead-on-arrival sa ospital si Constantino suno pa kay Mausig.

Na-recover sa area ang binangon kag 20 gauge shotgun nga ginapanag-iyahan sang suspetsado.

Mapasaka suno kay Mausig sang kaso nga Homicide ang pamilya sang biktima.

Preso na si Nepomuceno sa Maasin Police Station.