Pila ka grade 3 pupils sa San Miguel Central ES gin-ubo, ginsip-on, gina-atake sang asthma tungod sa sobra ka init nga tiempo
SAN MIGUEL, Iloilo – Mabatyagan na ang tuman ka init nga tiempo sa mga classrooms sa San Miguel Central Elementary School.
Suno kay Ivy Prevendido, adviser sa Grade III, mabatyagan gid ang tuman ka init halin las-11 sa aga tubtob las-kuwatro sa hapon. May 37 ka estudyante si Prevendido kag ginkumpirmar niya nga may mga nagalain na ang pamatyag tungod sa init.
“May ari ko estudyante nga may severe asthma. Absent gani subong. Kahapon nag-start ang hapo niya. Almost 90% sang kabataan ko subong ginasip-on, may ara gina-ubo kag may gina-atake sang asthma. Pati gani ako,” suno kay Prevendido.
May duha ka ceiling fans kag anum ka stand fans sa classroom ni Prevendido agud mahagan-hagan ang kainit.
Nagadala man ang maestra sang tubig ilimnon para sa iya mga estudyante agud malikawan ang dehydration.
Ginpabutyag ni Prevendido nga kumporme siya sa ginaproponer nga ibalik sa Abril kag Mayo ang school break. Pero sa subong, wala man sila sang mahimo kundi magsunod tungod kay Deped Order sila ginasunod sa diin nakaplastar kun san-o masugod kag matapos ang klase.
