Factory sang Molo wrapper, miswa sa Oton nga nasunog sang Abril naguba sang ginlabayan sang buhawi
ILOILO – Naguba liwat ang factory sang Molo wrapper kag miswa sang ginlabayan sang buhawi sa Brgy. Abilay Sur, Oton kahapon sang kaagahon, Hunyo 1.
Ang factory ginapanag-iyahan ni Reynold Forro nga nasunog sang Abril 29 subong nga tuig. Human sa light materials ang nasambit nga factory.
Sa pagpakig-istorya ni Abilay Sur, Oton Barangay Kagawad Nephtalie Betito kay Forro, ginabanta sa P20,000 tubtob P30,000 ang kahalitan sang buhawi tungod may mga stocks siya nga nabasa sang ulan.
Nagakinahanglan suno sa iya sang bulig si Forro tungod ini lang ang iya ginasaligan sa pang-adlaw-adlaw nila ilabe pa nga amat-amat pa lang nakatibawas sang nasunogan. Magluwas diri, naapektuhan man ang trabaho sang iya mga empleyado.
Wala gilayon makay-o ang factory tungod wala untat ang pag-ulan.
