Masobra tunga sa milyon nga balor sang suspected shabu na-recover sa mangunguma sa Barotac Viejo
ILOILO — Na-recover ang masobra tunga sa milyon ka pesos nga balor sang suspected shabu sa 42-anyos nga mangunguma sa drug buy bust operation sa Brgy. Poblacion, Barotac Viejo las-12:45 kahapon sang kaagahon, Agosto 1.
Ginkilala ang subject kay Randy Lamera, High Value Individual (HVI) kag residente sang Brgy. Cabugao Norte, Sta. Barbara.
Suno kay Police Major Ciriaco Esquilarga, hepe sang Barotac Viejo Municipal Police Station, posible naga-engage sa illegal activity ang subject para maka-income tungod madasig ang kwarta.
Ginpabutyag sang subject nga indi niya kilala ang ginakuhaan kag “ginahulugan” sang illegal drugs tungod nagatransaksyon lang sila paagi sa cellphone.
Nagalab-ut sa San Miguel, Banate, Pavia kag kaiping nga mga lugar si Lamera sa pagbaligya sang illegal drugs, suno sa police.
Sa operasyon kaina sang kaagahon, nabaklan si Lamera sang isa ka sachet sang suspected shabu sa balor nga P20,000.
Na-recover pa gid ang 18 ka sachets sang suspected shabu, sling bag, aluminum foils, kag mga non-drug items.
Ginabanta nagabug-at sang 74 grams ang tanan nga suspected shabu nga na-recover sa subject.
Ginatinguhaan sang Aksyon Radyo Iloilo nga makuhaan sang pahayag ang nadakpan.
