“We don’t have the right to judge” — CSWDO sa ila panawagan sa publiko nga untaton na ang malain nga comments vs 17-anyos nga nag-viral sa pagsaut sa bar
Ginhingyo sa publiko ni Elizabeth Hechanova, focal person sang Local Council for the Protection of Children sang City Social Welfare and Development Office (CSWDO), nga untaton na ang malain nga mga komento batok kay Shakira, ang babaye sa nag-viral nga video nga nagasaut sa sulod sang bar nga naka-panty lang kag t-shirt.
Suno kay Hechanova, na-turn over na sa CSWDO ang kaso kag may mga interventions na sila nga ginahimo. Ginpaathag niya nga indi maayo para sa dalagita kag sa iya pamilya kun may nagapadayon pa sa pag-share sang video kag nagahatag sang malain nga mga kumento.
Posible suno sa iya nga magbalik sa paminsaron sang dalagita ang tanan nga indi maayo nga natabo kun mabasahan niya ang mga kumento pagkatapos sang ila intervention.
Dugang pa ni Hechanova, may mga mas madalum pa nga isyu sa kaso sang dalagita nga wala mahangpan sang kalabanan gani mas maayo nga maghipos na lang tungod wala man sa posisyon ang publiko nga manghusgar.
TRANSFER OF ENVIRONMENT
Pangitaan sang taga-CSWDO sang lugar kun diin pwede makatenir si alyas Shakira.
Suno kay Hechanova, nagapakig-angut na sila sa iban nga himata sang dalagita kun diin siya mapatinir bilang kabahin sang ila intervention.
Ginpaathag ni Hechanova nga ginalantaw nila ang tanan nga aspeto kag mga anggulo kun ngaa nahimo sang dalagita ang kasubong nga aktuwasyon. Isa sa mga gina-consider sang CSWDO ang kumunidad nga gindak-an sang dalagita kabangdanan nga indi siya anay pagpapulion sa ila balay.
Posible suno sa iya nga naka-contribute ang exposure sang dalagita sa iya palibot kag ang pamaagi sang pagpadako sa iya sang iya ginikinan.
Lakip man sa ipaidalum sa intervention ang iya pamilya tungod dako man ang ila papel sa pag-develop kag pagpadako sang dalagita, dugang pa ni Hechanova.
Wala sang pat-od kun ano kalawig ang mangin intervention sang CSWDO tungod mangin depende ini sa mangin-response sang dalagita kag sang iya pamilya.
