P340K nga balor sang suspected shabu na-recover sa mag-live partner sa Estancia
ILOILO — Nakuhaan sang P340,000 nga balor sang suspected shabu ang 34-anyos nga manugbaligya sang uga kag ang iya live-in partner sa drug buy bust operation sa Purok 4, Brgy. Bulaqueña, Estancia kahapon, Agosto 10.
Ginkilala ang mga nadakpan kanday Argie Zamora, High Value Individual nga yara sa drug watchlist sang Estancia police, kag residente sang amo man nga lugar; kag ang iya live-in partner nga si Jona Beraye, 22-anyos sang Brgy. Cruz, Btac. Nuevo.
Suno kay Police Lieutenant Renzo Martinez, hepe sang Estancia Municipal Police Station, madugay na nila nga gina-monitor si Zamora nga naga-engage sa pagbaligya sang illegal nga druga tubtub nga ginhimo ang operasyon.
Ginrason niya suno sa police nga tungod sa kapigauhon nagabaligya siya sang illegal drugs.
Sa pagpangusisa sang police, ginakuha niya ang supply sang illegal drugs sa Iloilo City kag Bacolod City.
Na-recover sa duha ang pito ka sachets sang suspected shabu nga ginabanta nagabug-at sang 50 grams, 500 pesos nga buy bust money kag iban pa nga non-drug items.
