Lalaki nga makapila ka beses napreso sa kaso nga pagpangawat nadakpan sa drug buy bust sa City Proper
ILOILO CITY — Nadakpan sa drug buy bust sa Brgy. Maria Clara, City Proper ang 30-anyos nga lalaki nga makapila na ka beses napresu tungod sa nagkalain-lain nga kaso.
Suno kay Police Captain Roque Gemino III, OIC sang City Proper Police Station, ginkilala ang subject kay alias Tagoy sang Tanza Esperanza, City Proper.
Nabaklan ang subject sang isa ka sachet sang suspected shabu kag nakuhaan pa gid sang dugang nga sachets sang illegal drugs.
Ginabanta nagabug-at sang 17 grams kag may standard drug price nga P115,600 ang mga na-recover nga suspected shabu.
Base sa impormasyon sang police, napreso na sadtu ang subject sa kaso nga attempted theft/resisting arrest sang 2013; robbery sang 2015; kaso may kaangtanan sa illegal drugs kag Comelec Gun Ban sang 2016; theft kag violation sa Disobedience to lawful order sang 2020; frustrated murder kag pagpang-snatch sang 2022; nakapalagyo man siya sa kaso nga theft kag attempted theft sang 2023.
Isa ka tuig nga gin-monitor sang police ang subject nga ginatudlo nagapanghagad sa pila ka kabataan nga mag-engage sa illegal activities, suno kay Gemino.
Ginatudlo nga si alyas Totoy P sang Arevalo ang source sang illegal drugs sang subject.
