Pusil, granada kag suspected illegal drugs nakuha sa subject sang search warrant sa Mandurriao
ILOILO CITY — Nakuhaan sang pusil, granada kag ginapatihan illegal nga druga ang subject nga ginserbihan sang search warrant sang Mandurriao Police, Criminal Investigation and Detection Group sa Bingawan, sa Bakhaw, Mandurriao kahapon, Nobyembre 24.
Suno kay Police Captain Val Cambel, hepe sang Mandurriao Police Station, ginserbihan sang search warrant ang subject nga si alyas Amo may kaangtanan sa paglapas sa RA 10591 ukon Comprehensive Firearm and Ammunitions Act kag RA 9516 ukon ang Illegal possession or explosives.
Ginpahayag ni Cambel nga nangin posible ang pagdakup kay alyas Amo tungod sa impormasyon halin sa mga pumuluyo sang barangay nga kun mahubog ukon yara sa impluwensya sang illegal nga druga ang subject, masami siya nga nagahampang sang iya pusil kag ginapakita-kita ang iya nga granada. Dugang pa niya wala sang may na-report nga may gintayaan nga residente ukon nakaagi palupok ang subject sa lugar.
Nakaagi na presu si alyas Amo tungod sa pareho man nga kaso kag nakaguwa sang Setyembre subong nga tuig suno sa police.
Nakuha sa subject ang isa ka N26 hand grenade, caliber 45 nga pusil, isa ka magazine kag pito ka mga bala. Nakuha man sa bag kun sa diin nakasulod ang mga armas, ang 10 ka sachets sang suspected shabu nga ginabanta nagabug-at sang 15 grams kag may standard drug price nga P102,000.
Yara na sa kustodiya sang CIDG-Iloilo ang subject.
