Balay sa Alimodian nasunog

ILOILO –Nasunog ang balay sa Amantillo street, Poblacion, Alimodian kagab-i, Nobeymbre 28.

Suno kay Police Staff Sergeant Angello Amoyan, imbestigador sang Alimodian Municipal Police Station, wala sang tawo sa balay sang natabu ang sunog.

Ginpahayag ni Amoyan nga sa Cabatuan na naga-istar ang tag-iya sang balay nga si Emilia Rosaldes.

Natingala lang ang mga residente sa palibot nga nasunog ang balay tungod wala sang may nagatiner diri.

Nahingagaw palong ang kalayo kag wala na naglaton sa kaiping nga mga balay, suno sa police.

Wala sang may napilasan sa insidente.

Padayon pa nga gina-imbestigaran sang taga-Alimodian Fire station ang ginhalinan sang sunog.