Hibao-an flyover buksan sa Disyembre 15

ILOILO CITY – Natalana ang inisyal nga pagbukas sang Hibao-an Flyover sa Disyembre 15, suno kay Department of Public Works and Highways (DPWH) 6 OIC, Engr. Sanny Boy Oropel.

Pero ginpahayag ni Oropel nga posible mabag-o pa ang target date pananglitan indi manami ang tiyempo.

May nabilin pa nga mga ulobrahon kasubong sang right of way sa kilid sang flyover.

Sang Nobyembre 15 kuntani ang target nga pagtapos sang proyekto pero napaslawan ang contractor nga International Builders Corporation tungod sa wala untat nga pag-ulan.

Sa initial nga monitoring sang DPWH 6, wala sang movement ukon paghulag sa mga haligi sang Hibao-an Flyover.

Una na ginpasalig ni Engr. Edward Sudario, chief sang Construction Department sang DPWH-Iloilo City District Engineering Office, nga mahimo sila sang load test antes buksan ang flyover sa publiko.

Ang Hibao-an Flyover nagalaba sang 240 ka metro kag may pondo nga P591.2 Million

Ginalauman nga makabulig ang Hibao-an Flyover sa pagpahagan-hagan sang trapiko sa Pavia, San Miguel, kag Metro Iloilo, ilabe na sa Mandurriao, suno sa DPWH.