Barangay Kapitan sang Sto. Rosario, Ajuy patay sang ginbuno

ILOILO — Patay si Sto. Rosario, Ajuy Barangay Kapitan Cornelio Cacho, 67 anyos, sang ginbuno sang tricycle driver sa Malayu-an, Ajuy kahapon, Disyembre 31.

Suno kay Police Lieutenant Randy Lambungan, officer-in-charge sang Ajuy Municipal Police Station, nagapungko sa guwa sang tiyangge si Cacho sang gulpi ginbuno sa tiyan ni Jonel Amaba, 42-anyos residente sang amo nga barangay.

Ginhingagaw pa dala sa ospital ang biktima apang napatay samtang ginabulong.

Pagkatapos sang insidente, nagsakay sa depasahero nga bus ang suspect kag nagpalagyo, suno kay Lambungan.

Gilayon nga ginpalab-ot sang Ajuy police ang impormasyon sa mga police stations sa kaingud nga mga banwa rason nga nadakpan sa Anilao si Amaba.

Base sa imbestigasyon sang police, ginalantaw nga motibo ang pagpangimon sang suspect sa iya asawa kag sa barangay kapitan.