Malawig nga power outage sa Panay, Guimaras kag porsyon sang Negros Occ. na-eksperyensyahan halin kahapon, Enero 2
Naka-eksperyensiya sang malawig nga power outage ang bug-os nga Panay, Guimaras, kag porsyon sang Negros Occidental umpisa mga las-2 kahapon sang hapon tungod sa multiple power plant tripping sa Panay island.
Base sa advisory sang National Grid Corporation of the Philippines ukon NGCP, ila ginpahayag nga mga las-12:06 kahapon sang hapon, nag-trip off ang Unit 1 sang Panay Energy Development Corporation ukon PEDC.
Mga las-2:19 naman sang hapon, nag-trip off pa gid ang Unit 2 sang PEDC, ang Palm Concepcion Power Corporation, kag ang iban pa nga mga planta rason nga nagkulang ang supply sa Panay island.
Gilayon nga nagpagguwa sang advisory ang mga power distributors sa Panay, Guimaras, kag Negros may kaangtanan sa power interruption sa ila tagsa ka mga franchise area.
Wala pa matumod sang NGCP kun ano ang rason sang lapnagon nga power outage.
Madumduman nga sang Abril 2023, na-eksperyensiyahan man ang kasubong nga power outage sang tatlo ka adlaw.
Abril 27 sang nagligad nga tuig, naka-monitor ang NGCP sang system disturbance mga la-1:51 sang hapon nga nag-apekto sa Visayan grid.
Mga las-7:30 pa sang gab-i sa amo man nga adlaw amat-amat na nabalik ang power supply sa siyudad.
Pagka-Abril 28, las-2:56 sang hapon nag-trip off naman ang tanan nga units sang PEDC nga nagresulta sa unscheduled power interruption sa Panay, Guimaras, kag Negros.
Pagka-las-9 na sang gab-i, amat-amat na-restore ang power supply sa siyudad.
Apang mga las-2:41 sang kaagahon sang Abril 29, liwat nakabaton sang information ang More Power nga may asud-asod nga pag-trip off sang mga power plants sa Panay rason nga nagpatuman naman sila sang manual load dropping tungod sa limitado nga supply sang kuryente.
