Tourist guide nga barangay kagawad patay sang nalumos sa Miagao

ILOILO — Patay ang barangay kagawad nga tourist guide sang nalumos sa Bugsukan Falls sa Dalije, Miagao sang Sabado sang hapon, Pebrero 3.

Suno kay Police Lieutenant Lunelyn Talamillo, Deputy Chief sang Miagao Municipal Police Station, salbaron kuntani ni Kagawad Jesmar Gonzaga ang isa sa mga local tourists nga iya gina-guide tungod ginpahayag sini nga indi siya makahalin sa tubig bisan ginatinguhaan na niya nga maglangoy.

Natigayon nga mapahigad ang turista sa bulig sang tatlo ka iban pa nga turista kag sang kagawad, suno sa police. Pero sang ginbalikid na sang mga turista, wala na nila nakita ang kagawad.

Tungod sini, gilayon nga nagpangayo sang bulig ang mga turista kag nagtawag sang nakahibalo maglangoy agud pangitaon ang kagawad apang ulihi na sang nakita nga naglugdang na siya sa tubig, suno kay Talamillo.

Gindala pa sa ospital ang kagawad pero gindeklarar nga dead on arrival.

Ginpahayag ni Talamillo nga lunsay nakahibalo maglangoy ang apat ka local tourists nga nag-hike sa lugar nga gin-guide sang kagawad.