License sang contractor nga nagakay-o sa Ungka Flyover ginapa-usisa ni former City Councilor Plaridel Nava
PAVIA, ILOILO — Nagapati si anay Councilor Plaridel Nava nga ginhulam lang sang International Builders Corporation (IBC) ang una nga contractor sang Ungka flyover ang lisensya sang Monolithic Construction and Concrete Products Inc. agud ng ipaguwa nga ang nagda-og nga bidder ang nagakay-o sang infrastructure.
Suno kay Nava, daku ang posibilidad nga IBC gihapon ang nagamanehar sang construction works sa flyover kag indi ang Monolithic.
Nagapangita pa si Nava sang dugang nga ebidensya agud matumod kun insakto ang iya pagduda.
Ginpahayag pa sang anay konsehal nga imposible nga magpasugot ang Davao-based contractor nga hakuton ang tanan nila nga gamit kag equipment pakadto sa Iloilo sa balor nga P95 million.
Pananglitan nga mapamatud-an ni Nava, mahimo siya maka-file sang dugang nga kaso may kaangtanan sa Anti-Graft and Corrupt Practices Act sa IBC, Monolithic, DPWH 6 officials lakip na si OIC, Engr. Sanny Boy Oropel.
“Once makita ko nga may yara [nga] taga-IBC nga gaobra dira either equipment nila ara dira, tawo nila, Engineer nila ara dira we will file additional cases against them,” pahayag pa ni Nava.
Gin-award sa Monolithic Construction & Concrete Products Inc. ang pagkay-o sang flyover suno kay DPWH 6 OIC Engr. Sanny Boy Oropel tungod sa manubo nga bid amount kag technical experience ilabe na gid sa jet grouting activity kag experyensya sa technical personnel nga ma-supervise samtang ginahimo ang proyekto.
Una na nga nagpabutyag ang anay konsehal nga “frustrated” siya sa delay nga reaksyon sang Ombudsman sa imbestigasyon may kaangtanan sa Ungka Flyover.
