Asawa nasapwan patay sa kakugnan sa Bolilao, Mandurriao; Bana nag-ako sa krimen

ILOILO CITY — Utod ang apat ka mga tudlo sa wala nga kamot kag may pilas sang pagkalabo sa tangkugo si Emelyn Lasa, ang babaye nga nasapwan nga patay sa compound sang Gaisano ICC sakop sang Brgy. Bolilao, Mandurriao.

Nasapwan sang mga guwardiya sang Gaisano si Lasa nga nagahapaon sang nagkadto sila sa masi-utt nga porsyon sang lugar mga las-2 kahapon sang hapon, Pebrero 12.

Suno kay alyas Boy, nag-roving sila sang kaupod niya nga guwardiya kag nangihi sa kakugunan.

Nakit-an nila nga may puno sang kapayas gani ila ginkadtuan agud lantawon kun may bagnas nga bunga.

Pagpalapit nila sa kapayas, nakit-an nila si Lasa nga nagahapaon kag may mga pilas sang pagkalabo.

Gilayon sila nagpangayo sang assistance sa iban pa nila nga kaupdanan kag nagtawag sang police agud mag-imbestigar sa lugar.

Antes nasapwan si Lasa, nakit-an pa siya sang ila kasilingan nga si Emely pasado las-5 sang kaagahon nga nagalakat upod sa iya bana padulong sa direksyon sang Gaisano ICC halin sa ila balay sa Brgy. Bolilao.

Gin-ako ni Domingo Lasa nga bana ni Emelyn, nga siya ang nagpatay sa iya asawa.          

Pagkatapos nakumiter ang krimen, nagkadto sa iya mga himata sa Brgy. Walang, Lambunao si Lasa kag nag-surrender sa mga barangay officials pasado las-7 kagab-i.

Suno kay Walang, Lambunao Brgy. Secretary Stephen Genovea, nagpahibalo sa iya ang pakaisa ni Lasa nga ma-surrender siya tungod may nahimo siya nga krimen.

Gilayon nila nga ginkadtuan si Lasa upod ang duha ka mga kagawad kag didto siya una nga nag-ako.

Sunod nga gin-turnover sang barangay si Lasa sa Lambunao Police Station.