Voter registration para sa 2025 Midterm Elections nagsugod subong nga adlaw

Nagsugod subong nga adlaw ang voter registration para sa 2025 local kag national elections. 

Ginpahayag ni City Comelec Election Assistant II Jonathan Sayno nga bukas ang ila opisina halin las 8 sa aga tubtob las 5 sa hapon, Lunes tubtob Sabado kag sa tanan nga holidays.   

Wala naman suno sa iya sang registration sa Marso 28, 29 kag 30 nga amo ang Huwebes Santo, Biyernes Santo kag Sabado de Gloria.

Ginapaabot sang City Comelec ang 8,000 tubtob 10,000 ka mga new registrants tubtob sa pagtakop sang voter registration sa Setyembre 30.         

Magluwas sa gin-fill out nga registration form, kinahanglan nga magpresentar ang registrants sang valid IDs nga may pirma pareho sang national ID, postal ID, PWD ID, driver’s license, NBI clearance, Philippine passport kag PRC ID.