Pasahero nga eroplano nga may biyahe Manila-Iloilo na-alarma sang naghuni ang emergency alarm tungod sa lalaki nga nag-vape sa CR
ILOILO— Na-alarma ang mga pasahero sang eroplano nga may biyahe halin Manila-Iloilo sang naghuni ang emergency alarm tungod may nag-vape sa sulod sang CR sang Pebrero 12.
Sa Facebook post sang isa sa mga pasahero nga si Cai Dominguez, nakibot sila nga gulpi lang nabatian ang emergency alarm kag naghambal ang kapitan.
Ang nabatian niya nga ginhambal sang kapitan, “To someone inside the front lavatory you’re not allowed to smoke, you’re jeopardizing the safety of this flight. You will be sent to the police once we landed at Iloilo Airport.”
Nagguwa ang pasahero sa CR suno sa iya kag gin-escortan sang cabin crew kag ginpa-athagan nga indi puwede ang iya gin-ubra.
Paghugpa sang eroplano sa Iloilo International Airport mga las-2 sang hapon, nagahulat na ang Philippine National Police Aviation Security Group.
Gindugang ni Dominguez nga gin-hold pa sila sa sulod sang eroplano mga 5 tubtob 10 minutos kag ginpapanaug.
Ginpahayag sang reliable source sang Aksyon Radyo Iloilo nga wala man sang may nag-execute sang complaint tungod pabalik naman sa Manila ang eroplano gani gin-release ang pasahero.
