3 ka ginapatihan NPA members patay sa engkwentro sa San Joaquin, Iloilo
Tatlo ka mga bangkay sang Communist NPA Terrorist (CNT) ang na-recover sang 301st Infantry Brigade, Philippine Army paagi sa 61st Infantry Battalion sa nabukid nga parte sang Barangay Torocadan, San Joaquin makaligad ang encounter sa tunga sang mga suldado kag mga rebelde kahapon sang kaagahon, Pebrero 28.
Sa Facebook post sang 301st IB, naglawig sang 20 minutos ang encounter sa tunga sang ginabanta sa 20 ka mga miyembro sang Southern Panay Front, Komiteng Rehiyon-Panay (SPF KR-Panay) sa idalum ni Nahum Camariosa alyas Bebong kag 301st IB.
Magluwas sa tatlo bangkay sang mga rebelde, na-recover man ang lima ka high-powered firearms nga ginabug-usan sang apat ka M16 rifles kag isa ka AK-47 rifle; tatlo ka bandollers, commercial radio, kag siyam ka backpacks nga naga-unod sang mga personal nga kagamitan sang Communist NPA Terrorist (CNT).
May nakita man nga tinulo sang dugo ang mga soldado sa lugar nga nagakahulugan nga may napilasan sa mga nagpalagyo nga rebelde.
“SOBRA PA SA LINOG”
Nagapati ang mga residente sa Barangay Lomboyan, San Joaquin nga naggamit sang drone ang Philippine Army sa ila encounter batok sa NPA sa Barangay. Torocadan.
Suno kay Stella, residente sang Lomboyan, indi siya magpati nga normal nga eroplano ang nagalibot-libot sa lugar tungod lain ang tunog sini, may nagasiga nga green kag gulpi lang may ginhulog nga nagapula kag naglupok.
“Indi ko magpati nga normal lang gid nga eroplano basta nakita ko drone gid to tana. Bahol siga na, kulay green, may detector, ‘drone gid ra mu’ kay gulpi lang naghulog ang kwan nga daw naghaboy lang kag burubay, lupok dayon. Indi lang tu kuon nga linog. Sobra pa sa linog,” ang panaysayon ni Stella.
Sobra pa suno sa iya sa linog ang epekto sang nabatian nga sigabong sang ginapatihan niya nga bomba. Tungod sini, wala natulugan si Stella sa sobra nga kulba.
Ginpabutyag ni Stella nga mas malala subong ang encounter nga ila na-eksperyensyahan tungod tuman ka baskog ang impact sang pagsigabong nga nagpuhag sa bilog nga barangay. Magka-iping lang ang Lomboyan kag Torocadan nga amo ang encounter site.
Suno pa kay Stella, indi basta-basta makasulod sa encounter site ang mga soldado tungod nga banglid kag kakahuyan ang lugar rason nga nagapati siya nga naggamit sang air assets ang Philippine Army.
